مريضة نفسيًا في إحدى مستشفيات الأمراض النفسية والعقلية قالت :
-هاتي كدا المراية دي
=اهي اتفضلي
-يااااه دا انا شكلي اتغير اوي ، إمتي طلعتلي التجاعيد دي دا انا 25 سنة هما ليه ظهروا كاني كسرت ال70 سنة كدا ليه،هو الحزن بيعمل كدا ؟!
"سألت السؤال بحسرة كدا وقلب مكسور "
-طب تعرفي ،.......
-اتنهدت ... وقالت كل خط ف التجاعيد اللي ف وشي دا انا حفظاه كويس وعارفه كل واحد ظهر أمتي ، وكل مرة كان في حاجة ف قلبي بتتكسر كان بيظهر خط ف وشي عشان يثبتلي أن في حاجة اتكسرت جوا ، ياااااه ......
-تعرفي أن بس وحشني احساس أن ابقا فرحانة أو حتي مبسوطة، انا مبقتش عارفة شكل ضحكتي ولا فاكرة هي كانت عاملة ازاي ولا شكل ملامحي لما اجي اضحك، هو انا اللي بنسى بسرعة ولا انا اللي من زمان اوي مفرحتش ،..... -انت مبتردش عليا ليه ؟!
=أنا بنت مش راجل
-يااااه فكرتيني كنت لسه هقولك اني والله مبقتش اشوف بعيوني من كتر الدموع، نظري دا خاني مرة واحدة كدا ومبقتش بشوف غير طشاش كدا حتي عيني مبقاش فيها دموع، جفت
=ازاي مانتي بتعيطي اهو
-لا دا مش عياط دي حاجات بسيطة كدا بتنزل مني غصب عني، انتي مشوفتيش عياطي وانا لوحدي بليل بيبقا عامل ازاي، انا حاسة اني همشي قريب، هو فعلا اللي بيموت بيحس قبلها أنه هيمشي ؟
=ربنا يطول ف عمرك متقوليش كدا انتي لسه صغيرة
-ياريت الحزن كان حنين زيك كدا وكان قال دي لسه صغيرة وبعد عني ،......
-تعرفي ،...
-انا هنا مش عشان مريضة نفسياً لا انامش بتعافي من مرضى، بتعافي من مرضهم هما، هما اللي مرضي
=هما مين
-اللي كسروا بقلبي، اللي وجعوا قلبي ووصلوني لكدا ، أنا كنت كويسة والله كنت دائما واقفة بمئة راجل مع اي حد، عمري م زعلت حد مني ولا كسرت بخاطره، وحتي لو حسيت اني زعلت حد بفضل وراه لحد م يبقا كويس واتأسف مرة وعشرة، أنا كنت كويسة أوي معاهم هما ليه عملوا معايا كدا، أنا كنت شايلة مسؤلية كل واحد فيهم حتي أبويا وأمي شيلت مسؤولية تهد جبل بس مكنتش بتهد كنت بقع وبقوم تاني واقفة ع رجلي، كان أى مصيبة كنت ببقا أول واحدة اروح واجي وكنت فرحانة اني بعمل كدا، عشان كنت بحبهم، ف كنت بقدم كل ما بوسعي، إنما هما محبونيش ف مكنش قدامهم غير انهم يهدوا ويكسروا فيا وخلاص، وانا مش قد دا كله والله مش قد إن كل دا يبقا عليا وانا لوحدي ، وصلوني لكدا بسببهم ،....
=طب صحابك
-انا كنت صاحبة الكل بس معنديش صاحبة واحدة، اي واحدة فيهم كانت تغيب كنت بجري عليها واسأل عنها واهون عليها أى حزن لحد م تبقا كويسة كنت دائما بجبر بخاطرهم ودا مش كلامي دا كلامهم، بس لما انا أغيب مبلقيش حد أو بلاقي بعد مابقى كويسة ألاقى سؤال منهم، طب هما كانوا فين وقت حزني عشان يهونوا عليا، معقول أنا كنت ف كل حزن كدا لوحدي واقع وأقوم لوحدي من غير إيد حتي تسندنى.
=بس مش المفروض كنت تهوني على نفسك شوية عشان صحتك حتى.
-صحتي دي اكتر واحدة كانت حاسة بيا، قولوني كان دائما بدينى إشارات أنه حاسس بحزني كان دائما تاعبنى، شعري كان دائما واقع، بصي حتي مبقاش عندي غير شوية صغيرين، بقع زرقا بقت تظهر ع جسمي عشان تحسسني أنها حاسة بيا،بصي كدا ع دراعي ورقبتي بصي بقوا ظاهرين ومش بيروحوا ازاي، ضربات قلبي ووجعه، ضيق نفسي اللي مش بقدر اخده بليل، عيني اللي وجعاني من الدموع، الحدائق السودا حولين عيني، الشبكة العنكبوتية الوريدية بقت كتير اوي ف جسمي بقا كل حاجة بتعلن في جسمي أنها تعبت من كتر الحزن وكأنهم بيقولوا احنا معاكي احنا حاسين بيكي احنا حزننا يشبه حزنك.
-انا كنت بحبهم والله وكنت بعملهم كل خير، بس هما من جواهم مش كويسين أذونى ف كل حاجة من غير ميحسوا، كانوا دائما بيحبطوا فيا ودايما بيعيروني باني من صغري شايلة مسؤلية، كانوا دائما بيتريقوا عليا وعلى شكلي، اكمن شكل سناني مش لطيف وضحكتي مش حلوة وعيني لونها اسود مش ملون وبشرتي غامقة شوية شكلي جسمي تخين حبتين، هي دي حاجات انا ممكن اصلحها ماهي بتاعت ربنا مليش دخل فيها.
-ااااااااه... لو تعرفي انا حاسة بايه دلوقت، حاسة اني قلبي هينفجر بس يالا مش مهم انا كدا كدا ماشية.
=انا حاسة بيكي،... وبعدين هتمشي تروحي فين
-تعرفي كان ممكن الطريق دا كله يهون بكلمة انا حاسة بيكي، كان نفسي اسمعها من حد قريب مني وأحس فعلا أنه حاسس بوجعي عالأقل مكنتش هوصل لهنا دول حتي مكانوش بيسالوا مالك؟.
-مش قولتلك إنى حاسة إنى همشي بدري.
-بقولك ايه ، هو في حد جي سأل عليا.
=.....، ايوة في اتنين جم سالو عليكي.
-انتِ بتكدبى زيهم ليه، هما مصدقوا إنهم ارتاحوا مني محدش فيهم جه من يوم مدخلت هنا وكل مسأل حد يقولي ايوة ف اتنين جم انتوا قائلين لبعض كدا عشان نفسيتي لكن انا مش هبلة والله، انا عندي اكتئاب مع شوية مضاعفات، يعني بالعقل لو عايزين يسألوا ليه مش بيجيوا ف وقت الزيارة عشان حتي يشوفوا انا وصلت لفين؟!
=والله مش عارفة اقولك إيه.
-متقوليش أنا عارفة كل حاجة.
-انا هرجع لمكاني وانتى روحي شوفي شغلك بس متنسيش تبقي تيجي تسألي عليا زيهم ....
=مش هنسي إن شاء الله وهبقي أجى كل يوم تفضفضي شوية
-لو لقيتني بقا،......
=هلاقيكي إن شاء الله، سلام ..
-سلام ... بس أمانة لو جم عشان يخدوني جثة قولي لهم إنى وصلت لده كله بسببهم ومش هسامحهم ، ولا اقولك انا اصلاً مسمحاهم عشان خايفة عليهم يبقوا زي كدا بسبب ذنبى أنا مسمحاهم هما مش هيستحملوا دا، بس قولي لهم يوقفوا لحد كدا عشان كفاية ضحايا هنا ف المستشفي بسبب مرضهم، كلميهم شوية وعلميهم ازاي يبقوا بيقولوا كلام كويس ويجبروا بخاطر اللي حواليهم، وابقي وريهم كل علامة ف جسمي وخليهم يعرفوا أنهم السبب، انا همشي بس العلامات هتفضل معلمة لحد م اقابلهم يوم القيامة،..... ربنا يسامحهم
"كأنها تخاطب عالم بأكمله ليس فقط من أذوها "
" العيب كان فى الناس مش فيها ".
#علياء رجب.