حديثنا اليوم عن شاعر ذو الواحد والعشرون عامآ ,تحدي الكثير من الصعاب للوصول لحلمه ,لقائنا اليوم مع المبدع علي السيد دعونا نري مايخفيه هذا الشاعر الموهوب.
س1/اسمك وسنك ؟
_علي السيد -21 سنه من محافظه الشرقيه مركز اولاد صقر.
س2/ مانوع موهبتك؟
_شاعر عاميه.
س3/نوع دراستك؟
_بدرس في جامعة الازهر كلية الدعوه الاسلاميه.
س4/بدٲت مسيرتك امتي وازاي؟
_بدأت مسيرتي الشعريه من 3 سنين
كنت في شغل مع شخص بيكتب شعر ف سمعته وعجبني الكلام ف قولت اجرب اكتب زيه وبدأت اسمع للشعرا الجدد زي الجخ وعمرو حسن حبيت كلام عمرو حسن وبعد سنه قررت اكتب وكان اول نص اكتبه في 13 / 11 / 2019
بعدين بدات اخوض التجربه واكتب لحد ما اتعلمت الوزن وبدأت اقرا واسمع للشعرا القدامى مثال فؤاد حداد والابنودي وفؤاد نجم لحد ما طورت من نفسي وكتابتي وبعدين درست عروض عشان مكونش بوزن سماعي بس ، لحد دلوقتي يعني تقدري تقولي بقالي سنتين بكتب شعر.
س5/ اول شخص عرف موهبتك كان مين؟
_اول ما بدات عرف موهبتي صحابي ولكن مصدقوش وكانوا بيستهزاو بيا وبيسخروا وبيقولولي انت سارق الكلام ، وعانيت كتير بما اني في بلد ريف والاختلاف عندنا بيكون صعب ، بس ميأستش وفضلت بحاول لحد ما اثبتت اني اقدر ومعظمهم رجعوا تاني يتأسفوا ولكن بعد ما فات الاوان.
س6/ ماهي الحفلات التي كنت جزء منها؟
_عملت حفلات كتير قبل كده 18 حفله كانت مع شعرا وكانت حفلات مشتركه ، واخر حفله كانت يوم الجمعه الي فاتت 13 / 8 وكانت اول حفل منفرد ليا والحمد لله نجحت نجاح كبير وجميل.
س7/ حصلت علي شهادات الكترونيه او ورقيه من قبل؟
_حصلت على شهادتين ورقي قبل كده + ان موضوع الشهادات بالنسبالي شيء عادي جداً ومهواش الشيء العالي الي الشخص يفتخر بيه لانها كلها شهادات صوريه ليس الا حلمي اني اخد جايزة احمد فؤاد نجم ودا قريباً وقت ما اقرر انزل بديوان.
س8/ ماهو اصعب شيء واجهك في الوصول لحلمك؟
_عواقب كتير منها ، ان في ناس شعرا محبتش اني اكتب اصلا وناس قالت علي السيد الد اعدائي والي قال يا انا يا هو ، ليه معرفش ، ومن اصعب الحاجات الي واجهتني ف البدايه كان اهلي لانهم كانوا رافضين دا نهائي بس الحمد لله دلوقتي بيدعموني وبيشجعوني بقوه ، وطبعا في ناس كتير بتتكلم عني من ضهري بدون تعامل معايا خالص ولكن الحمد لله ديما بلاقي الي يدافع عني.
س9/من كان سبب دعمك؟
_ليا كتير بيدعموني اولهم وأهمهم صاحبي واخويا " ايمن شحاته "
وصاحبي احمد حكم وفي ناس تانيه بس دول اهم اتنين
واهلي بيدعموني
وليا صحاب كتير بتدعمني
وعندي جمهور قد اي جميل وبيحبني لشخصي قبل كتابتي وشايفني قدوه ليه ومفتخرين بيا وكإنهم عيلتي مش جمهور.
س10/كيف تواجهه الانتقادات؟
_اي نوع انتقاد بقابله بيكون ديما ب الطريقه الساهله يعني حتى لو انتقاد بطريقه تزعلني بقوله عندك حق وحاضر وان شاء الله وبسكت مبردش ولو انتقاد هيفيدني فعلاً بفضل اسأل الشخص دا عن حاجات كتير عشان اتعلم ، وفي كلا الحالتين مبزعلش نهايي بل بالعكس باخد دافع اكبر
س11/ ماهي نصيحتك للشباب؟
_ركز على هدفك وحلمك مهما كانت الصعوبات الي هتقابلك لإنها زي ما قابلت غيرك هتقابلك وان الحلم لازم تمشيه لأخره ولازم ف الاخر تلاقي نفسك الي ربنا خلقها الهدف لان ربنا مبيخلقش حلم ف قلب حد الا وهو عارف انه يقدر يحققه ف مقدمكش غير انك تحقق ، متسمعش كلام حد وعدي اي انتقاد او اي كلام استهزاء كإنه طيف عابر وخليك مركز وعندك اراده وعزيمه انك توصل مهما الوقت طال عليك
بقلم الصحفيه/روضه جمعه.
من جريده لحن.