حوار خاص مع المبدعه أروي ابراهيم والصحفية رهام الباز

 

أسمك؟ أروى إبراهيم

سنّك؟ 18 سنة

محافظتك؟ الغربية

موهبتك إيه؟ الكتابة

بدأتِ موهبتك أزاي؟ وأنا صغيرة كنت بميل لان أنا اكتب الحاجات اللي بتضايقني والحاجات الجميلة اللي بتحصل معايا وبعدين بدأت أقرأ روايات بدايتي كانت مع رواية  "ايكادولي" للمبدعة  د/حنان محمود لاشين

مين اللي دعمك؟ ناس كتير بتدعمني ويخص بالذّكر والدتي وزمايلي ف الدفعة اللطيفة اللي حقيقي مش هتتكرر ومدرس اللغة العربية أ/محمود الشاذلي

إيه المشاكل اللي واجهتك في نجاحك وأزاي تخطّتيها؟ عامةً هي مش مشاكل حقيقية بس إحيانًا بلاقي نفسي مش قادرة أفكر أو أكتب ودا مش فقدان شغف لأني مؤمنة ان الشغف دا وهم بنحطه لنفسنا عشان نبرر التقصير بس أحنا نقدر نكتب في إي وقت وبواجه دا بأني بجيب إي صور وأكتب عليها إرتجالات.

إنجازاتكِ إيه؟ أنا في بداية الطريق ومحققتش إنجازات حقيقية بس كل مرة بقدر أطلّع فيها مشاعري أو أفكاري على هيئة كلمات وتلمس حد يقراها بعتبره إنجاز لي.

هل في كتب هتشتركي فيها وهتنزل قريب؟ أنا عندي شغف بالأعمال الروائية و بتمنّى اكون كاتبة روائية بس شايفه انه لسه قدامي كتير على خطوة زي كدا.

مين قدوتك في الكتابة؟ د/حنان محمود لاشين.

نفسك توصلي لإيه في مجالك؟ يكون ليا أعمال على أرض الواقع ويكون في لو شخص واحد بيستناها.

شايفة أنك قربتي تحققي أحلامك ولا لسة؟ لسه قدامي كتير بس ان شاء الله هوصل

عايزه تنصحي غيرك بإيه؟ النّجاح ملهوش مقياس وكل إنسان بيلاقي شغفه فحاجة وبيقدر ينجح فيها فبلاش لو وقعنا فحاجه نفتكر أننا فاشلين يمكن دا مكانش مكاننا من البداية.

أتم الحوار الصحفي بقلم الصحفية: رِهام الباز.