مساء الخير
أنا الصحفية/مريم مصطفي
من جريدة لَحْنّ الأدبية والأخبارية، ممكن الموافقة أني أعمل حوار صحفي معاكِ؟
معاكي ل أي إستفسار
-ممكن تعرفي نفسك في بضعة سطور؟
جهاد كمال
20 سنه
طالبه جامعية بدرس دراسات إنسانية قسم إجتماع جامعة الأزهر
ممكن تقوليلنا بدأتي كتابة أمتى؟
تقريبًا من 2019 بس مكنش حد بيشوف كتباتي غير بعض القريبين مني
هل واجتهك صعوبات ف المجال؟ وازاي تخطيتيها واتعاملتي معاها؟
بتقابلني في الفكره إزاي اجيب فكره مختلفه وملمه بكل القواعد علشان تبقى ناجحه، خاصة إن كتباتي بتعتمد على عدد معلومات كبير، بس بقدر أتخطاها بفضل ربنا والناس اللي بتدعمني.
بالنسبالكِ الكتابة هواية او موهبة ولا ممكن اي شخص يكتب عادي؟
بالنسبالي الإتنين وبيكملوا بعض، بس ممكن بالنسبه لشخص تاني يكتب بس مش كل من مسك ورقه وقلم بقى كاتب ولا كل من كان عنده تفاعل بقى كاتب النت لو فصل يوم عن العالم يبقى نجاحه المنبهر بيه ده في الهوا، كل حد يقدر يكتب بس مش أي حد يقدر يقدم محتوى.
من رايك الكاتب المثالي او الناجح بيتصف ب اي؟
طريقة سرده، قوة اللغه عنده، المحتوى اللي بيقدمه، الصدق في الشعور والكلمات، إختلاف الفكره.
مين مثلكِ الأعلي؟
لكل مجال مثل أعلى
د/إبراهيم الفيقي
الشيخ محمد متولي الشعراوي
د/مصطفى محمود
د/احمد خالد توفيق/حنان لاشين/أحمد خالد مصطفى
مايكل جاكسون
مين وقف جمبك وشجعك ف اول خطوة ليكِ ف المجال؟ والدتي أولًا كانت أكبر داعم ومشجع ليا، وصحابي نورهان عطية، وروان إبراهيم، وأميرة عبدالله، ومنار صلاح.
أستاذ عمار خلف، حنان عبد الحي
إيقاع غچري خاصه.
ليه رغم أنك بدأتي كتابة من ٢٠١٩ منزلتيش بعمل فردي ليكِ لحد دلوقتي؟
علشان مكنتش بإعتبارها كتابه أصلًا تعتبر فضفضه مع نفسي بس أنا أول مره أظهر حقيقي كان في نص في كتاب مجمع كنوز غچريه 2021 في معرض الكتاب، وبعدها بدأت أكتب بجد وكتباتي تتطور وتتشاف.
كلمينا عن خططك المستقبلية ف مجال الكتابة؟
في قصه نازله المعرض الجاي 2022 في كتاب دهاليز غچريه، وبكتب عمل منفرد بيناقش قضية منتشره في كل المجتمعات وتقريبًا محدش إتكلم عنها قبل كده، بس مش هقدر أقول هي ايه غير بعد ماتكمل.
هدفي في السنين الجايه عمتًا اني مش عايزه الناس تشوف الدنيا بعيني زي ما الأغلب بيعمل، أنا عايزه ٱحطهم على أول الطريق وأفتح عيونهم وأخليهم يشوفو بس بعيونهم همه.
في أقاويل أنك بتشتغلي بجانب دراستك وموهبتك ممكن تكلمينا عن شغلك وازاي بتقدري توفقي بينه وبين والباقي؟
هو أنا إشتغلت فتره وسبت الشغل ده لسبب ما فحاليًا مش بشتغل، وبحاول ألاقي نفسي في حاجه شبهي أكتر وبرسم خطط تانيه.
ده شيئ يرجع لشخص نفسه ومن وجهة نظري أفضله على الأقل بعد مايتخرج يكون فهم جانب منه حتى لو كانت تجربه غير موفقه، الإنسان هو اللي قدر ينظم وقته ويشوف هو يقدر يعمل ايه ويعمله.
بالنسبالك ايه الي أتغير في شخصيتك من أول بدايتك في الكتابة؟
كان عندي مشاكل في التواصل قدرت أحل جزء منها، إتعرفت على بيئه أفضل ومتعاونه، إكتسبت صدقات وخبرات جديده، بقيت بعرف أعبر أحسن، ونظرتي إتغيرت في حاجات كتير.
هل ناوية تتوسعي في مجال الفاشون؟
بإذن الله الفتره الجايه هتطور من نفسي لحد ما أوصل لمرحله بتمناها، وبعد كده هتوسع أكتر.
هل واجهتي انتقادات في بداية رحلتك وازاي تخطيتيها؟
أكيد اتوجهتلي إنتقادات، بس أنا مش بركز معاها لأني مؤمنه بنفسي وحواليا اللي أنا عوزاهم يبقو مؤمنين بيا ودول اللي يهموني بس مش الباقي، ومبحبش أرد على الإنتقادات وأناقش حد هو معملش حاجه في حياته عمتًا علشان يجي ينتقدني، حتى لو عمل أنا راسمه خطه لنفسي ماشيه عليها وعارفه إن ربنا هيوفقني وأوصل ل ٱحلامي حتى لو مبتكلمش عنها، لأني مبحبش أتكلم عنها غير لما أوصلها.
سمعتِ عن جريدة لَحْنّ؟
شوفت اللقاء اللي عملتيه مع ميرنا وكان مكتوب فيه إسم الجريده🌚
وجهي كلمه للكُتاب والجريدة؟
بشكرهم على الحوار اللطيف ده ولُطف مريم طبعًا وأتمنالكم التوفيق ديمًا.
للكتاب كل شخص بيجي الحياة علشان يقدم رسالته الخاصه بس بطريقة مختلفه، وربنا خاصنا بالكتابه من الممكن تكون نعمه أو نقمه، فقدموا أعمال تكون حُجه لكم لا عليكم.
شكراً جداً يا جهاد علي الحوار اللطيف ده ولطفك وادام الله إبداعك.
سعدت جدًا بالحوار معاكِ شكرًا جزيلًا.