مساء الخير
أنا الصحفية/مريم مصطفي
من جريدة لَحْنّ الأدبية والأخبارية، ممكن الموافقة أني أعمل حوار صحفي معاك؟
ممكن
ممكن تعرفي نفسك في بضعه
سطور؟
أنا حبيبة أحمد17 سنة في ٢ ثانوي عام..
كاتبة روائية وشاعرة
عندي رواية في المعرض اصدار 2021 باسم "هنا يقبع قلبي" وطلعت في حفلة في مركز الربع الثقافي العام الماضي
وشاركت في تأسيس كيان كتابي بيساعد وبيدعم الكُتاب والحمد لله ناس كتير منهم مأنكرتش فضل الكيان لما بقى ليها اسم تقيل في الوسط.
ممكن تقوليلنا بدأتي كتابة أمتى؟
من حوالي 4 سنين تقريبًا
مين أكتر الشخصيات اللي قابلتكِ ف مجال الكتابة وأثرت فيكِ ككاتبة؟
د. أحمد خالد توفيق
د. حنان لاشين
ناس عظيمة
هل واجتهك صعوبات ف المجال؟ وازاي تخطيتيها واتعاملتي معاها؟
كتير جدًا ولازالت بتواجهني، أحيانًا بقدر أتخطاها وأحيانًا تاني بتتغلب عليا وبتحتم عليا الرضوخ ليها، بس عديت كتير منها ولسة بحاول أعدي لإن مفيش انسان بينجح من اللاشيء ولا في نجاح من غير تعب، ربنا قال وخلقنا الانسان في كبد، يعني حياتنا كلها تعب ومشقة، فيا تتعب وتنجح يا تفشل وبرضو هتتعب..
بالنسبالكِ الكتابة هواية او موهبة ولا ممكن اي شخص يكتب عادي؟
أي شخص متمكن في اللغة العربية يقدر يكتب، ممكن شخص من كتر الضغوطات يلجأ للكتابة لتفريغ الشحنات السلبية اللي جواه، لكن مش أي حد بيقدر يكمل وياخد القارئ في رحلة مع حروفه وكتاباته، الجميع يكتب ولكن ليس الجميع يصف.
من رايك الكاتب المثالي او الناجح بيتصف ب اي؟
بالصبر، أنا بشوف أي كاتب ناجح بيتقبل النقد وبيبقى عنده القدرة ياخده كتشجيع مش احباط ويأس ويطور من نفسه كمان كاتب مثالي جدًا بصراحة، مع الإضافة بإنه يكون متمكن لغويًا جدًا والسرد بتاعه فعلًا قوي ومنظم.
مين مثلكِ الأعلي؟
بصراحة مفيش شخص محدد بس أي انسان صالح وناجح أنا باخده مثل أعلى ليا في شغلي ودراستي وبقتدي بيه.
مين وقف جمبك وشجعك ف اول خطوة ليكِ ف المجال؟
والدتي
كلمينا عن خططك المستقبلية ف مجال الكتابة؟
ان شاء الله بعد 3 ث هبدأ في تجهيز روايتي الجديدة اللي هتكون مختلفة تمامًا عن نوع الرواية الحالية، وكمان هشارك في كثير من الحفلات لو ربنا أراد لي بإذن اللّٰه، وههتم أكتر بكيان مراسيل لإنه صدقًا أضاف كثير من الخبرات لكُتّاب كتير فحابة يكون في فرص أكتر لناس تستحق الدعم ومش لاقياه.
هل عندكِ مواهب تانية؟
معتقدش عندي غير الكتابة والالقاء.
سمعتِ عن جريدة لَحْنّ؟
الحقيقة دي أول مرة
وجهي كلمه للكُتاب والجريدة؟
نصيحتي ليهم ياريت ميسمحوش لشيء يكون عائق بينهم وبين تحقيق حلمهم، أيًا كانت خطورة المواجهة لازم تواجه وتغامر، على قد ما المغامرة هتكون خطيرة شوية وصعبة على قد ما هترضيك من جواك إنك أخيرًا عملت حاجة بتحبها، وحقيقي بشوف أي حد بيستسلم بسهولة شخص فاشل مش قد حلمه وعمره ما هيكون قد أي حاجة بعد كدة إلا من رحم ربي وبتكون ظروفهم قاسية صدقًا وبتعجزهم بشكل كبير عن مواصلة استمرار سعيهم لتحقيق حلمهم وهدفهم..
وحابة أشكر الجريدة لإنها شافتني شخص يستحق الحوار وارجو من اللّٰه أن يسدد خطاكم ويوفقكم ويجعل لكم النجاح أينما كنتم
كلمة أخيرة نختم بيها الحوار الصحفي؟
شكرًا لربنا علىٰ نعمُه، وشكرًا لماما لتعبها معايا ومعافرتها، ولصحابي اللي دايمًا يساندوني، وأخيرًا ليكِ على لطفك وحسن محاورتك
شكراً جداً يا حبيبة علي الحوار اللطيف ده
سُعدت جدًا بالحوار معاكِ شكرًا جزيلًا.
عفوًا ياجميل