السلام عليكم أنا الصحفية/سُهيله عبداللطيف
من جريدة لَحْنّ الأدبية والأخبارية، ممكن الموافقة أني أعمل حوار صحفي معاكي؟
أكيد وشرف ليا.
١-ممكن تعرفي نفسك في بضعة سطور؟
أنا اُميمة عبدالله، ١٩ سنة، أولي معهد فني صحي قسم تمريض عام من بني سويف مركز ببا تحديدًا.
٢-ممكن تقولنا بدأتي كتابة أمتى؟
بدأت كتابة من سنتين، تحديدًا ١٠/١٠.
٣-مين أكتر الشخصيات اللي
قابلتك في مجال الكتابة وأثرت فيكي ككاتبه؟
ماقبلتش شخصيات صراحة وأثرت فيا؛ لإني منعزلة عن السوشيال حبتين، أو منفردة بنفسي وبإسلوبي وبسردي وبأفكاري، مابحبش الإنغماس مع باقي الناس اللي بتكتب أوي.
٤-هل واجتهكي صعوبات في المجال؟ وإزاي تخطيتها وإتعاملتي معاها؟
أه واجهت أكتر من صعوبة، أول صعوبة كانت إني منصبة كل تركيزي علي عدد التفاغل اللي هاحصده علي كتاباتي، ف كان أي ريتش قليل بيأثر علي معنوياتي وبيسببلي إحباط
ومابنصحش حد يبص للتفاعل ويكون كل همه كام ريأكت حصده .
تاني صعوبة وهي إن كل الناس بتستسهل كلمة كاتب، وأي حد يكتب كلمتين يلقب نفسه بكاتب.
٥-بالنسبالك الكتابة هواية أو موهبة ولا ممكن أي شخص يكتب عادي؟
الكتابة موهبة ومش هواية إطلاقا لإن هواياتي حاجات تانية، وبكتب لما بيجيلي الشغف إني أكتب مش أكتر.
لا مش أي شخص يكتب عادي.
٦-من رايك الكاتب المثالي أو الناجح بيتصف ب اي؟
أولاً مافيش حاجة إسمها كاتب مثالي لإن مافيش حد يقدر يوصل للمثالية، كل يوم الأفكار بتتجدد وطريقة السرد ذات نفسها بيحصلها تعديلات.
بس الكاتب الشاطر اللي يقدر يوصل إحساس كلامه للناس بكل سهولة، يعني في فرق شاسع بين شخص كتب جملة ووصل إحساسها للناس وشخص عشان يوصل نفس إلاحساس يكتب صفحتين تعبير.
تاني حاجة طريقة السرد، بتكون محببة لكل الفئات وسهلة الفهم، يعني مايكتبش حاجة الناس تستصعب فهمها، لأن إيه الغرض من الكتابة! إن أنا أوصل هدف أو رسالة أو نصيحة، ف أنا عايز أدي أستفادة ودا المهم، ف أركز علي الرسالة وأكتب مفردات سهلة الناس تفهمها .
تالت حاجة، الإطالة، الكاتب الشاطر اللي يوصل هدفه بطريقة مقتصرة جداً وماينقصش من إحساس الكلام أو إدراك الرسالة شئ.
الكاتب اللي بيطيل أوى في كلامه، يبقي مش عارف يوصل المعني صح لأما هو بيحب يتلذذ بالتفقه بكمية المفردات اللي عنده.
٧-مين مثلك الأعلي؟
أهلي فقط خاصة أمي وأبي.
٨-مين وقف جمبك وشجعك ف أول خطوة ليك ف المجال؟
أمي.
٩-كلمنا عن إنجازاتك؟
بفضل الله وصلت ل٢٠٠ ألف متابع علي فيسبوك، نزلت كذا رواية سوشيال وليس ورقي
آركين
شرياد
قلب ذكري
بتكلم بإستفاضة عن العلاقات الزوجية خاصة والعلاقات الإجتماعية عامة.
بوصل إستفادة من كل تجربة شخصية مريت بيها أو سمعت عنها وأثرت فيا.
١٠-كلِمنا عن خططك المستقبلية فِ مجال الكتابة؟
مافيش خطط مستقبلية للأسف لإني حاليا منعزلة عن الكتابة، واخدة فترة راحة لحد ما يكون عندي شغف، مابحبش أجبر نفسي لإني سبق وذكرت إنها موهبة وليست هواية
وأنا مش متطلعة لأي مكانة، أنا لما بحب أكتب بكتب، مش بتسابق عشان أوصل لحاجة بعينها.
١١-هل عندك مواهب تانية؟
لا.
١٢-سمعت عن جريدة لَحْنّ؟
لا للأسف ماسمعتش عنها.
١٣-تتمنى أي من الجريدة الفترة الجاية؟
أنا ماعرفش عن الجريدة كتير، ف ممكن تكون مش محتاجة أي نصيحة مني أو إني أطلب حاجة ممكم تكون موجودة، ف يشرفني طبعا أتعرف علي الجريدة الأول.
١٤-وجه كلمه للكُتاب والجريدة؟
أظن إني من خلال تجربتي في الكتابة، وأكاد أكون كاتب عادي جداً ليس بعظيم، ف أنا عايزة أوصل بس، إن إنتَ مش في سباق مع حد، وإن إنت مش بتعمل كدا عشان تلم متابعين وشوية ناس يحبوك، إنت بتعمل كدا عشان إنت من جواك بتحب إنك تعمل كدا بعيدًا عن رأي أي حد فيك وبعيدًا عن إن البوست اللي إنت لسه منزله وصل لكام شخص وإنت حاطط تارجت ريتش قد إيه .
متحسبهاش بالأرقام، هاتحبط جداً جداً.
إكتب عشان إنتَ بتحب تكتب، ودا هايكون مرجع ليك مع الوقت، لما تدخل صفحتك وتقرا كلامك وتلاقي نفسك مبدع في شئ معين ف دي أعظم نظرة لنفسك.
إكتب عشان أهلك إنت، ولادك في بعد يدخلوا صفحتك ويقروا إن أبوهم في سنه دا كان بيعرف يكتب كويس وأبدع في شئ معين .
١٥-كلمة أخيرة نختم بيها الحوار الصحفي؟
شكرا جدا للجريدة وإتشرفت بالتعامل مع سهيلة واتمني أكون عند حسن الحظ.
سعدت جدًا بالحوار مع حضرتك شكرًا جزيلًا.