أنا الصحفية آلاء عرفه
من جريده لحن الأدبية والإخبارية
كنت حابة أعمل مع حضرتك حوار صحفي، موافق؟ -موافق
1-ممكن تعرفنا عن نفسك؟
-ابرام ناصر وليم.
-من المنيا مركز بني مزار _22 سنة.
2- ممكن تقولنا بدأت تمثيل امتى؟ -بدأت سنة 2012 كان عندي 11 سنة
_مين الشخصيات اللي قابلتك في مجال التمثيل وقدرت إنها تأثر فيك؟ المخرج الكبير حمدي طلبه، كان بمثابة أب في كل لحظة بجد
_هل في أي صعوبات واجهتك في المجال دا؟ مفيش حلاوة من غير نار أكيد، والمشكلة الكبيرة اللي كانت موجودة إني من الصعيد وزي ما حضرتك عارفة، إن الصعيد مش مسلط عليها الضوء ف الفن عمتًا؛ فكان بالنسبالي إني محتاج أتعلم أكتر وأطلع من البيئة اللي انا فيها، فقررت ساعتها إني أنزل القاهره وأشتغل مسرح، كنت مثلًا أطلع هنا من البلد 5 الفجر أوصل 9 الصبح، أفضل قاعد من 9 ل3 العصر وأقعد على المحطة لحد 3 البروفا تبدأ 3 لحد 8 مثلًا، وعقبال ما أركب لحد المحطة وكده ولحد البلد أرجع 4 الفجر تاني يوم، وهكذا 3 أيام في الأسبوع، يعني كنت بروح أنام كام ساعة، وأركب تاني وأروح، وكل ده كان من غير مقابل طبعًا لمدة أكتر من سنتين بهذا الوضع، ودايمًا كنت أروح ورش وأتفرج، وكل ده كان من جيبي؛ لحد ما وصلت إني في أيام كانت بتوصل أنام علي المحطة الكام ساعة دول، دي من المواقف، غير طبعًا مثلًا الناس الكتير اللي كانت تقعد تقول يعني انت مثلًا هتعمل إيه في الأخر، شوفلك شغل مش هتنفع مش هتعمل كان غيرك اشطر.
4-بالنسبه لحضرتك التمثيل دا هواية ولا موهبة، ولا ممكن أي حد مثلا يقدر يمثل؟ الموهبة لوحدها مش كفاية طبعا، لكن الموهبة بتأثر في جزء كبير قوي في الطريق، الموهبة محتاجة اجتهاد كبير قوي طبعًا، ولازم الممثل أو المخرج طول عمره يكون على يقين إنه هيتعلم من أي شخص هيقابله، لأنه لو حس إنه كامل؛ هيقف وهيحس إن أكبر من إنه يتعلم، مفيش حد مبيتعلمش، ودايما الممثل لازم ميكونش عنده سقف طَموح، كل ما يعدي خطوة يبص للي بعدها.
5-من رأيك الممثل المثالي أو الناجح بيتصف بإيه؟ _الإجتهاد ثم الإجتهاد ثم الإجتهاد، ويكون طموح، وإنه يكون على اقتناع تام إنه يسمع ويستفاد من كل اللي جنبه.
6-مين بقا مثل حضرتك الأعلى؟
_والدي ووالدتي وأختي مفيش أعظم منهم وده بجد.
7-مين أكتر حد وقف جمبك وشجعك في أول خطوة ليك، وكان الدافع إنك توصل للمرحلة دي دلوقتي في مجال التمثيل؟
_الطريق طويل، اتعلمت حاجات كتير من ناس كتير، وفي ناس كتير وقفت جنبي، لكن اللي كان مؤمن بيا دايمًا زي ما قولتلك أستاذ حمدي طلبه كان أخ وصديق وأب
8-كلمنا بقا شوية عن إنجازاتك في مجال التمثيل.
_ أنا مخرج مسرحي، وبمثل لكن مخرج أكتر ، أنا عدد الجوايز اللي حصدتها أكتر من 30 جايزة وأنا عندي 22 سنة.
9-كلمنا عن خططك المستقبلية في الإخراج والتمثيل وناوي تعمل اي؟
_من الحاجات اللي نفسي أحققها إني أبقى ناجح طول الوقت، وأتعلم أكتر وأتلون طبعًا، وكل حاجة أعملها تكون مختلفة بشكل ولو مختلف عن اللي قدمته قبل كدا، يعني كل مرة أقدم حاجة للجمهور أقدمها بعين مختلفة؛ لأن المخرج بيقدم اللي شايفه بعينه للجمهور، نفسي عيني كل مره تكون مختلفة.
10-هل عندك موهبة تانيه؟
_لا مش عندي الحقيقة.
11-هل سمعت عن جريدة لحن قبل كدا؟
_بصراحة لا.
12-تتمنى إيه من الجريدة الفترة اللي جاية؟
_تتدعم مجالات كتير غير الكتابة وتدعم الشباب أكتر.
13-ممكن حضرتك توجه كلمه للكُتاب وللجريدة؟
_كل الشكر والتقدير والإحترام لحضراتكم، ولإحترامك في التعامل طبعًا، وشكرًا من كل قلبي، وأتمنى لكم مزيد من التقدم والإزدهار النجاح.
14-قولنا كلمة أخيرة نختم بيها الحوار الصحفي.
_لو خيروك بين إنك تكون ناجح أو مشهور إختار إنك تكون ناجح؛ لأن سهل تكون مشهور لكن صعب تكون ناجح َوصادق.
ومن هنا أنهي مع حضرتك الحوار الصحفي وبجد كنت مبسوطة قوي من الكلام مع حضرتك، وانت نموذج للشاب المصري اللي ممكن يحقق اللي هو عايزه ويقدر يوصل في الوقت اللي هو عايزه.
شكرًا جدًا لحضرتك....