السلام عليكم أنا الصحفية/الاء عرفه
من جريدة لَحْنّ الأدبية والأخبارية، ممكن الموافقة أني أعمل حوار صحفي معاك؟ اه طبعا اتفضلي
١-ممكن تعرف نفسك في بضعة سطور؟ ريهام ناجي من محافظة الشرقية وعندي 16 سنة
٢-ممكن تقولنا بدأت كتابة أمتى؟ من حوالي أربع شهور كدا
٣-مين أكتر الشخصيات اللي قابلتك ف مجال الكتابة وأثرت فيك ككاتب؟ دكتور حنان لاشين طبعًا ونفسي أبقى في يوم من الأيام زيها
٤-هل واجتهك صعوبات ف المجال؟ وازاي تخطيتها واتعاملت معاها؟ طبعًا صعوبات كتير، في الأول إحباط اللي حوليا كان بيأثر فيها بطريقة سلبية وكتير فكرت إني أوقف كتابة بس جيت فكرت كويس وقولت أكيد أنا لسه في بداية المشوار وهتعرض للسلبيات دي كتير وبقت محطش في دماغي كلامهم واتخطيته والحمدلله دلوقتي لقية تشجيع من كل اللي حواليا
٥-بالنسبالك الكتابة هواية او موهبة ولا ممكن اي شخص يكتب عادي؟ موهبة لإن مش أي حد يقدر يكتب ويوصل إحساسه وشعوره للقراء وفي ناس بتبقى عندهم هواية الكتابة بيحبوا يكتبوا بس ساعات مبيعرفوش يوصلوا للقارئ اللي بيوصله الموهوب واللي عنده الموهبة للقارئ
٦-من رايك الكاتب المثالي او الناجح بيتصف ب اي؟ كل كاتب ناجح في عمله أي كاتب طريقة سرده للأحداث وحبكتها ووصفه للشخصيات ووصلها لقلب القراء وقدرته على إن يخلي القارئ يعيش مع الشخصيات وأحداث الرواية دا كاتب ناجح
٧-مين مثلك الأعلي؟ دكتور حنان لاشين
٨-مين وقف جمبك وشجعك ف اول خطوة ليك ف المجال؟ صحابي كان في منهم اللي بيحبطني وكان في منهم اللي بيشجعني وكان. تشجعهم ليا وإحباطهم بردو بيفرق معايا جدًا لإني كنت لسه في بداية مشواري وكل كلمة منهم كانت بتأثر فيا وفي منهم اللي قالي انتي سارقة الروايات دي وبتقولي انتي اللي كاتبها كنت بتعب وبزعل جدًا من الكلام دا بس دلوقتي الحمدلله بعد ما شافوا اللي انا وصلت له بقوا يشجعوا فيا
٩-كلمنا عن انجازاتك؟ مش عايزة أحرقها عشان لسه بنشوف الموضوع دا وزي ما المثل بيقول داري على شمعتك تقيد، بس انا حاليًا رواياتي نزلت على جوجل وجريدة لحن الأدبية والإخبارية والحمدلله انا لسه في بداية المشوار واتمنى أوصل لحاجة كبيرة في الأيام اللي جاية
١٠-كلمنا عن خططك المستقبلية ف مجال الكتابة؟ 1 خطط كتير الصراحة ومنها إن ينزلي كتاب في معرض الكُتاب
١١-هل عندك مواهب تانية؟ لا هي الكتابة بس ( كتابة روايات واسكريبتات وخواطر)
١٢-سمعت عن جريدة لَحْنّ؟ ايوا طبعًا
١٣-تتمنى اي من الجريدة الفترة الجاية؟ أتمنى تكبر وتبقى معروفة أكتر من كدا
١٤-وجه كلمه للكُتاب والجريدة؟ الكُتاب: اتمنى تكملوا في مشواركم للآخر متسمحش لكلمة توقفكم الكلام مبيلزقش وخليك دايمًا مؤمن بموهبتك ومؤمن باللي انت بتكتبه وخلي اللي بيحبطوك ويوجهولك كلام سلبي خلي الإحباط دا مصدر إلهام ليك عشان تثبتلهم عكس كلامهم ولما توصل تقولهم انا اهو وصلت وبقيت حاجة كبيرة انتوا بقى عملتوا اي
الجريدة: اتمنى تفضل متألقة دايمًا وتفضل تدعم الكُتاب
١٥-كلمة أخيرة نختم بيها الحوار الصحفي؟ زي ما في ناس بـيحبطوك فيه ناس مراهنين على نجاحك متكسفهمش أحب أختم بيها والكاتب اللي لسه في بداية مشواره متيأسش من كلامهم انت قدها وهتوصل وزي ما المثل بيقول اتقل على الرز يستوي، وأحب أشكر الصحفية الجميلة آلاء عرفة كنت مبسوطة جدًا بالحوار مع حضرتك واتمنى تكوني في نجاح دايمًا
سعدت جدًا بالحوار مع حضرتك شكرًا جدا لحضرتك