مساء الخير
أنا الصحفية/مريم مصطفي
من جريدة لَحْنّ الأدبية والأخبارية، ممكن الموافقة أني أعمل حوار صحفي معاك؟
مساء النور
معاكِ
ممكن نبذة تعريفية عنك ؟
اسمي سحر طارق سامي
من محافظة المنوفية
طالبه في الفرقه التالته حقوق جامعة المنوفيه
كاتبه في مبادرة مختلف
صدر لي كتاب مُجمع قصصي باسم مسافات
وآخر ما صدر لي كتاب صندوق بريد في معرض 2022 تابعين لمدينة الكتب للنشر والتوزيع
أمتي بدأتي كتابة ؟
من 2013
بس بدأت أظهر اللي بكتبه في 2019
أيه العوائق الي كانت بتواجهك ؟
مكانش عندي داعم وكان فيه إحباط طول الوقت من اللي حواليا وديمًا يتقال جمله معينه "انتِ فاشله متفكريش نفسك هتكوني حاجة"
واحيانًا مبلاقيش مواضيع أكتب فيها أو بيكون عندي الموضوع ومش عارفه ابدأ ازاي أو هل الموضوع دا كويس اني اكتبه
عندي تردد كبير
أزاي بتقدري تتخطي عوائق دي ؟
متغلبتش على معظمها بس اتغلبت على التردد لما قدرت أعمل كتاب خاص بيا ودا كان بسبب شخص بدون ذِكر اسمه شجعني إن اسلوبي في الكتابه محتاج يتشاف وإني مش فاشله وأقدر أكون شيء لو آمنت بنفسي
شايفة الوسط فترة دي ناقصه ايه ؟
ناقصه حُب
معظم اللي في الوسط مبيحبوش بعض وجودهم حوالين بعض مجرد سيط وتطبيل، وبقول المعظم عشان صوابعنا مش شبه بعض
مين كان بيدعمك في أول خطوة ليكِ ؟
أهلي و3 اصحابي
مين مثلك الأعلي ؟
نجيب محفوظ، أحمد الشيخ، جمال الغيطاني، الكاتب العظيم محمد الدسوقي ،احمد خالد توفيق
مين من الناس في وقت حالي من وجهة نظرك ممكن يكون زي جيل نجيب محفوظ وناس عظيمة دي ؟
حبيبة أحمد ومحمد الدسوقي ودينا محسن وإسلام شاهين من الناس اللي كتاباتهم بتأثر فيا وبحس إن ليهم مستقبل حقيقي
ومريم مصطفى سعيد عشان بحبها.
ايه أهم إنجازاتك ؟
صندوق بريد أهم شيء حصل في حياتي لأنه مش بس إنجاز، كل شخص قرأه اثر فيه
وشاف إنو غير في حياته من الجانب السلبي للجانب الإيجابي.
حاليًا بتحضري حاجه ؟
خلي السؤال إجابته مفتوحه لأجل غير مُسمى
شايفة كتابة لأي حد ولا لازم الموهبة ؟
لازم الموهبة
القرأه اللي للجميع وليست الكتابه يا اخ.
تنصحي ب ايه الكُتاب مبتدئين ؟
يقرأ كتير ويتعب مفيش حاجة بتيجي سهل
سمعتي عن جريدة لحن قبل كدا ؟
شوفت الحوار بتاع محمد ودي كانت أول مره أسمع عنها
تتمني ايه من جريدة فترة جاية ؟
انها تكون جريده ورقيه
تحبي تقولي كلمة قبل ما نختم حوار صحفي ؟
اشكرك على اللُطف دا وإني بحبك يمريوم.