_:ممكن نبذه بسيطه عنك ؟
_:انا اسمي نورا عايد
عندي 19 سنه
طالبه بالفرقة الاولى كليه الحقوق جامعة عين شمس
بكتب نثر وشعر لكن بميل للشعر أكتر
_:امتا بدأتي كتابة وحسيتي أنك عندك الموهبة؟
_:انا بدأت كتابه من خمس سنين واشتغلت ع نفسي اول سنتين فيهم،وقدرت اني احسن مستوايا بدون كورسات في اي مجال او انتمائي لأي دورات شرح في اي كيانات،اخدت سنتين بس بطور من نفسي في النثر قبل الشعر،لكن في الاخر اختارت طريق الشعر لإني بميل ليه اكتر وبقالي كدا بكتب 3 سنين بكتب شعر
_:إيه أكتر العوائق الي كانت بتواجهك ؟
السخريه!،من صحابي، من البيئة المحيطة بيا لأنها أرياف،فـ معظم الوقت سخريه من كوني شاعره،مكانش حد مصدق اني اقدر اوصل ل اللقب دا واستحقه،ولما وصلتله في منهم سخروا اكتر يعني اي شاعره يعني،ومع كل خطوة بحققها كنت بشوف سخريتهم دي بتروح،لحد ما كل شخص منهم بقى مآمن بيا وبيحب يسمعني
_:إزاي قدرتي تتخطي العوائق دي ؟
بالسكوت!،كنت دايماً بسكت وارد على سخريتهم بخطوة كويسه في طريقي دا،واغير نظرتهم ليا،واخليهم يحسوا اني مش شايفه كلامهم ولا يعنيلي شي،قدرت امنع ان حد يحبطني بسبب كلمه،وقدرت اخليهم يبطلو يتكلمو اصلا
_:مين الناس الي كانت بتدعمك في أول خطوة ليكِ؟
_:امي♥️،مهما اختلف اللي دعموني واختلف عددهم،امي كانت اولهم،جه ع حياتي ناس وصحاب كتير يدعموني وكلهم كانو فترات!،امي كانت الثابته في الاول دايمًا وعمري ما نسيت نظرتها ليا وفخرها ب كل شي بحققه،بابا مكانش شايفني في السكه دي،بس بالوقت بقا داعم ليا برضو وبينزل معايا كل الحفلات وبقى واثق ف موهبتي،وميرفت،اصغر صحابي،واكبرهم مقام،ميرفت كانت جمبي ف اول كل خطوة ولسه ثابته مهما حصل ومهما كانت ظروفها بلاقيها جمبي ف كل مكان،ومؤخرا جمبي صحاب كتير بيدعموني،اهم دينا لبيب وتسنيم سامح وفريدة الجعفري وغيرهم كتير...
_:إيه أهم إنجازاتك ؟
_:ظهرت في حلقة تلفزيونيه في برنامج بين الكلمات،انجزت اول ديوان ورقي منفرد ليا"الشعر ڤيروس حاد" في معرض 2021 والتاني نزلت بيه معرض 2022 وكان إسمه الغربه،شاركت في حفلات شعر مختلفه ولكن كلها في مكتبة مصر العامه في الزاويه الحمراء لأن المكان دا فعلا مقرب لقلبي،واخدت شهادات الكترونيه كتير تبع مسابقات ع بيدجات وكيانات خاصه بالشعر
_:شايفة الوسط ناقصه ايه ؟
الوسط ناقصه احترام!،الا من رحم ربي،وانا مش حابه اشوف الوسط دا ولا بنتمي لأي كيان من كياناته ولا اي تجمع،انا بعيدة تمامّا عن الوسط دا،انا نورا بس،اصلا مفيش شيء اسمه وسط،دي كلمه اجتمع شويه اشخاص وحطوها وبالوقت بقت عنوان لحاجات لا داعي اذكرها اصلا
_:هل شايفه أغلبيه اصحاب الكيانات متسلطين ؟
_:مبعترفش بالكيانات لو كانت متخذه طريق الاستغلال اللي واضح تماما،كتب مجمعه بفلوس،حفله وتكريم بفلوس،دوره تدربيه للكتابه وهيديهالهم طالب زيه زيهم بفلوس،اي شي بيتقدم بفلوس ف الكيانات دي استغلال،عاوز تعمل شي كويس اعمله بشكل ميخليش سمعتك وسمعه كيانك تكون وحشه،في مبادره لطيفه زي بين الكلمات دي علامه نضيفه ف الوسط دا،ومبعترفش الا بكيان واحد،وهو طفره،لأنه مؤسسه تعليميه اكتر من كونه كيان
_:مين نقدر نقول عليهم جيل نجيب محفوظ القادم ؟
_:دا في النثر!
لإنه مكانش شاعر،فـ شايفة ان من اقوى اقلام الوسط في النثر محمد عمار،محمود البدري،محمد ابراهيم "سجين" ،حقيقي قلمهم فوق الرائع بمراحل وانا بعز قلمهم جامد
_:مين مثلك الأعلي ؟
_:أمي!،مع ان المتوقع الاجابه تكون شاعر او كاتب،بس انا قادره اكون اعظم من اكبر الشعراء والكتاب لو عندي اصرار امي وثقتها في نفسها،لو انا زي امي!هكون في مكان اعظم من كل اللي وصلوله...♥️
_:مين كان اكبر داعم ليكِ ؟
أمي ،وأمي،وأمي،وعلى كل سؤال هتكون هي اول اجابه،الكل بيتغير،وناس بتظهر تدعمنا وتختفي،وناس بتظهر تدعمنا وبعد فتره تعجب ب قلم غيرنا ف تدعمه،وناس بتمر وتسيب وتبعد،امي الوحيدة اللي عاشت معايا الطريق دا خطوة بخطوة وهيا احق واحدة بأي كلمه هتتقال عن الدعم في سبيل حلمي..
_:ازاي قدرتي توصلي لـ الي أنتِ فيه دلوقتي ؟
_:وصلتله بصعوبه حقيقي،من بين كم انتقادات كبير اوي،وفترات عزله واكتئاب ،وصلتله لما بدأت امحي كل الناس من قدام عيني واسد ودني عن كلامهم واحط حلمي قدامي وامشي ناحيته،واقع واقوم واكمل،اهه اوقات كتير كنت بقع ويتريقوا ويسخروا،بس كنت بقوم واكمل،والحمدلله راضيه جدا عن اللي حققته وانا لسه بنت متمتش 19 سنه وشايفه ان دي مجرد بدايه وقدامي كتير بإذن الله وبإصراري هحققه..
_:تتمني ايه من الجريدة فترة جاية ؟
_:انها تدور على كتاب اسمهم مش موجود بشكل كبير بس قلمهم قوي وتظهر اقلامهم للنور،انا مثلا عارفه اني ك نورا في ناس تعرفني ومكتفيه بالعدد دا ،غيري مش ظاهر ف هو اولى ان اسمه يظهر ويتشاف،لأن في مواهب كتير متداريه
_:كلمة أخيرة قبل ما نختم الحوار الصحفي ؟
_:حابة اقول اني حلوة!،هو اه شيء غريب وملوش علاقة بسياق الكلام،بس انا في الطريق دا اتعرضت لحاجات كتير ومواقف كتير من ناس حسستني اني وحشه،بس لا انا حلوه،وبقول دا لنفسي دايما ف بكمل،وبنجح،وبقوى،وبحقق كل شي،ولذلك بلاش نخلي اي شي يفقدنا ثقتنا في نفسنا،المشاكل والعقبات وضغط الناس وكلامهم ما هو الا دليل ع نجاحنا واننا شاغلين بالهم،لإن مفيش حد وحش بيشغل بال الناس،لذلك كلنا حلوين!،وكلنا ناجحين،واول خطوة نجاح لينا هي نجاحنا في نظرنا احنا♥️