مساء الخير
أنا الصحفية/مريم مصطفي
من جريدة لَحْنّ الأدبية والأخبارية، ممكن الموافقة أني أعمل حوار صحفي معاك؟
مساء النور، اتشرفت بحضرتك، أه موافقة.
ممكن تعرفينا بنفسك ؟
أنا روان محمد الجناينى، أولى جامعة، من محافظة دمياط
18 سنة.
بدأتي كتابة من امتي يا روان؟
من صغرى وأنا بحب اللغة العربية، بس بدأت كتابة من وأنا فى تانية ثانوى.
أيه العوائق الي كانت بتواجهك؟
الحمد لله مكنش فيه عوائق صعبة أوى، أحيانًا بس بفقد الشغف وبرجع أكمل تانى، أو أشوف إن النص ال بكتبه محتاج تطوير أكتر عشان يقدر يوصل للناس، فبشتغل كتير على النصوص عشان أقدر أطلعها بشكل كويس.
بتعملي ايه عشان تتجنبي عوائق بسيطه دي ؟
بحاول مضغطش نفسى وأنا بكتب أى نص بحيث كل نص ياخد حقه فى الكتابة والمراجعة، وأى فكرة كويسة بتجيلى لنص ما، ومقدرتش أكتب عنها في وقتها، بدَونها عندى بحيث ممكن أرجع لها تانى وأستفيد منها.
هل الكتابة من وجهة نظرك لأي شخص أم لازم شخص عنده الموهبة؟
أنا شايفة إن الكتابة عكس أى موهبة ممكن نتعلمها، الكتابة لازم تكون موهبة نابعة من الشخص نفسه، إن الشخص دا قادر يوصف إحساسه أو إحساس غيره من خلال الكتابة، ومؤخرًا بقا فيه ورش للكتابة وتطويرها، ودا شئ جميل جدًا لأى حد عنده الموهبة، لأن من وجهة نظرى الورش الخاصة بالكتابة ما هى إلا وسيلة للتطوير وليس لإكتساب الموهبة.
المجال حاليًا نقصه أيه من وجهة نظرك ؟
محتاج الإهتمام بالكُتاب المبتدئين وتشجيعهم، يكونوا على دراية كافية بقواعد النحو الأساسية؛ لأن مؤخرًا بقا فى ناس كتير بتكتب بس للأسف بتكون القواعد النحوية مش مظبوطة فدا بيغير المعنى وبيضعف النص
مين من الناس في وقت حالي من وجهة نظرك ممكن يكون زي جيل نجيب محفوظ وناس عظيمة دي ؟
ممكن أقول الكاتب أدهم الشرقاوى، الكاتب محمد طارق، و دكتور عمرو عبد الحميد.
مين الناس الي كانت بتدعمك في أول طريقك؟
فى بداية مشوارى أول الناس اللي شجعتنى كانت صديقتى"آية"، وبحكم إنها كانت بتكتب كنت باخد رأيها فى نصوصي قبل ما أنزلها ونتناقش فيها لو محتاجة تعديل، عائلتى وخاصةً أختى كانت ومازلت بتدعمنى جدًا وتشجعنى، ومنساش أصحاب ثانوى اللي كان لهم دور كبير فى إنى أستمر، وأخيرًا أصحاب الجامعة و السوشيال رغم معرفتى الجديدة بهم، بس بفضل الله قدرت بعض نصوصى أنها تلمس قلوبهم وتعبر عنهم، وحاليًا هم مصدر كبير لتشجيعى.
مين مثلك الأعلي ؟
مفيش حد معين، بس بحب أقرأ لدكتور حنان لاشين، دكتور أحمد خالد توفيق، الكاتب أدهم الشرقاوى، دكتور عمرو عبد الحميد، كل كاتب منهم بيكون له أسلوبه و رونقه الخاص.
ايه أهم إنجازاتك ؟
بالنسبة للأعمال، فلحد الآن مفيش إنجاز ورقى.
بالنسبة لى شخصيًا؛ فأنا اتطورت فى طريقة الكتابة من خلال مسابقات الإرتجال والقراءة ومستمرة بإذن الله ودا يعتبر إنجاز مهم جدًا بالنسبة لأى كاتب لأن أى إنجاز بعد كدا هيترتب على الإنجاز دا،
من الإنجازات اللي أنا معترفة بيها إنضمامى لكيان إيقاع غجري، وخاصةً تيم جموح العظيم، اللي كان بيشجعنى دايمًا وبيطور من موهبتى، ومؤخرًا انضممت لكيان روح عازفة بجانب كيان إيقاع غجري.
هل سمعتِ عن جريدة لحن قبل كدا ؟
أيوا، سمعت عنها من صديقة ليا، اتعمل معاها حوار صحفى مع الجريدة.
تتمني ايه من جريدة فترة جاية ؟
أتمنى إنها تفضل تشجع الموهوبين لأن دا حقيقى بيفرق معاهم.
تحبي تقولي كلمة أخيرة قبل ما ننهي الحوار ؟
أول شئ حابة أشكرك على الحوار، وبشكر أى حد كان بيشجعنى وكان سبب في إنى أستمر، حابة بردو أوجه كلمة للكُتاب المبتدئين، حرروا أقلامكم، ومتخلوش حد يحبطكم، طوروا من موهبتكم، و بمرور الوقت هتتمكن أكتر من الكتابة؛ لأن ببساطة الموهبة زى البادرة لو اهتميت بيها هتُزهر، ولو أهملتها هتذبل، دُمتم بخير.
❤❤❤❤
ردحذف