انا اللي نصيبي من الدنيا شوية هموم
عندى النفس بقا مقطوع
والهم بقا موصول
يا حيل مهدود
وجسم مهمود
يا دنيا اضحكِ ولو ضحكة واحدة في وش المتعوس
أنا اللي بقيت بنادي الابتسامة بالعودة
وكإنها مهاجرة
أنا اللي إيدي شقاينة عشان أكل العيش
بنام وأفكر
هل بكرا هنعيش؟
كان نفسي أنام على المخدة
وأقول معايا فلوس تسد تمن العيش
أنا اللي يوم شغل وخمسة مفيش
أنا اللي من كتر الهموم بعدت واتنسيت
أنا اللي ببص في وش أصحابي وكإني بالنسبة ليهم خيال بدون ملامح
أنا اللي مطلوب مني أكون سند البيت
أنا مليت
أنا محتاج الدعم من كل واحد في البيت
أنا اللي محتاج جبر لخاطري
أنا اللي بدور على حب ينسي
أنا محتاج نفسية جديدة تنسي الطيبة وتبقى عنيدة
أنا محتاج قلبي ينسى وميشلشي
أنا اللي بتمنى يا دنيا في مرة تضحكِ في وشي.
بقلم شاهندة سعيد