من جريدة لَحْنّ الأدبية والأخبارية، ممكن الموافقة أني أعمل حوار صحفي معاكي؟ طبعا
١-ممكن تعرفي نفسك في بضعة سطور؟
انا بنت بسيطة مش الافضل في احسن مني وكتير وانا مش احسن من حد لكني مش مشابهة لحد ولا حد يشبهلي
٢-ممكن تقولنا بدأت كتابة أمتى؟
بدأت كتابة من صغري فسن ١٣سنة كنت دايما بحب اكتب خواطر ونصوص بالفصحى وكنت بألف اسكريبتات صغيرة من قبل ما افهم انها اسكريبتات وقصص قصيرة وكنت بحكيها لصحابي وماما اكتشفت دا وبدأت ادخل الوسط الأدبي من خمس سنين بالظبط.
٣-مين أكتر الشخصيات اللي قابلتك ف مجال الكتابة وأثرت فيك ككاتبه؟
الكاتب "فادي رضا" حقيقي من اكتاب اللي اول ما بسمعلهم كلمة بتشد وبقول بكل تلقائية اني اقدر فيوم ابقا بالثقة دي واقول الكلام دا ومن الكلمة اللي شدتني لفادي قبل كدا ككاتب لما اتسأل فحفل روايته"هروب مستمر" اتسأل ان ازاي كفادي بعد كل التخبطات والتأثيرات اللي حصلتله قدر يوصل للمكانة اللي هو فيها ولنجاح روايته؟ واللي رد باربع كلمات هزوا الحفلة وقتها هما "اني كنت عايز اوصل" ففادي من انجح الشخصيات اللي بتحفزني دايما اني اسعى لحلمي، ومن الشخصيات برضوا المؤثرة فيا الشاعر احمد نادر اللي دايما بيحفزني بجملة *"عافر هتوصل مفيش مستحيل"* ، والكاتب عبد العليم منا، والكاتبة ميري جرجس وغيرهم.
٤-هل واجتهك صعوبات ف المجال؟ وازاي تخطيتها واتعاملت معاها؟
اكبد طبعا صعوبات كتير ولكني تعديتها لاني كنت بجري ورا حلمي وكنت بحفر فالصخر حرفيا عشان افضل واقفة وتخطيتها بوقفة كتير من الاصدقاء جنبي زي أدالشاعر احمد نادر، وصاحب الصوت اللي بيلهمني أخويا محمد رأفت، والديزاينر دانيال الكسندر، وغيرهم.
٥-بالنسبالك الكتابة هواية او موهبة ولا ممكن اي شخص يكتب عادي؟
ممكن اي شخص يكتب اي شيء بس مش اي حد يكون عنده موهبة الكتابة الكتابة مش مجرد حروف بتترمي بتكون سطور بالعكس دي زي السحر التعويذة يا تتكتب صح يا تبقا باطلة.
٦-من رايك الكاتب المثالي او الناجح بيتصف ب اي؟
بالتصالح مع نفسه وحب الخير لكله قبل نفسه وانه يكون عنده قدرة نشر الحب ما بين الكل لان الكتابة مش عن الاكتئاب وبس بل هو بيوصل الرسالة كمان يعني خاطرة من كاتب محترف تقدر تحول حيات شخص فلحظة انه يقرأ الخاطرة دي.
٧-مين مثلك الأعلي؟
أنا، ومش نرجسية بل ثقة فذاتي اني افضل نسخة مني اه في افضل واه في اوحش بس مفيش مشابه.
٨-مين وقف جمبك وشجعك ف اول خطوة ليكي ف المجال؟
الكاتب عبدالعليم منا اول شخص حفزني وخلاني اندفع كدا من اول دخولي المجال انا كنت على نمط واحد والكاتب عبد العليم منا وهبني الدفعة اني اكمل وشجعني اني اطور وكانت اول خطوة ليا بفضله بعد ربنا هي اول كتاب الكتروني ليا باسم"رسائل الحرمان"
والشاعر احمد نادر اللي بفضله تطورت فالشعر واللي بفضله اول حفلة احضرها كضيفة شرف يوم الاربع القادم الموافق١٧مارس وهلقي لاول مرة قصيدة من قصايدي قصاد الجماهير.
٩-كلمنا عن انجازاتك؟
كل ما اتميته مظنش انه انجاز لسة سواء كتاب الخواطر او القصايد او اول حفلة ليا الانجاز اني مقفش وافضل مكملة.
١٠-كلمنا عن خططك المستقبلية ف مجال الكتابة؟
إن شاء الله السنة الجاية انزل باول رواية ورقية ليا فمعرض الكتاب وبإذن الله في حفلات كتير قريب.
١١-هل عندك مواهب تانية؟
الرسم انا من وانا صغيرة وانا بحب الرسم وبرسم اي رسمة لمجرد النظر ليها ولكنها مش قريبة لقلبي زي الكتابة.
١٢-سمعت عن جريدة لَحْنّ؟
سمعت عنها قبل كدا ولكن اول مرة اتعامل مع شخص منها وهي سهيلة وحقيقي مفيش بعد كدا جمال وزوق واللهم بارك يعني شيء قمر.
١٣-تتمنى اي من الجريدة الفترة الجاية؟
اتمنى منها الاستمرار دايما فدعم الكتاب وإظهار صوتهم وحكايتهم للناس لان دا شيء بيحفزنا ككتاب وبيدينا دفعة وطاقة كبيرة نكمل سعي.
١٤-وجه كلمه للكُتاب والجريدة؟
متبطلش سعي ابدا مهما وقعت لان عمرك ما هتعرف قيمة الوقوف والنجاح غير بعد معاناة وتعب الوقوع وزي ما قال صديقي الشاعر احمد نادر "عافر هتوصل مفيش مستحيل".
١٥-كلمة أخيرة نختم بيها الحوار الصحفي؟
بحب اشكر الجريدة وبحب اشكر سهيلة على لطفها واسلوبها الجميل فالتعامل حقيقي حبيتها جدا وسعيدة بالحوار معاها واتمنى النجاح الدائم للجريدة ولسهيلة واخر شيء للجميع "عافر هتوصل".
سعدت جدًا بالحوار مع حضرتك شكرًا جزيلًا.